Samfunnskunnskap.no

کۆمەڵگەی خۆشگوزەرانی نەرویج بەوە دەناسرێت کە دەزگا فەرمییەکان بەرپرسیاریەتی گەورەیان لە ئەستۆدایە. دەوڵەت، پارێزگەکان و شارەوانییەکان بودجەی بەشێکی زۆری دەستکەوتەکانی خۆشگوزەرانی دابین دەکەن، وە هەروەها ئەوان چاودێری دانیشتوانیش دەکەن کە ئایا پەیڕەوی یاساکانی سیستمەکە دەکەن.ئامانجەکە ئەوەیە کە هەموو دانیشتوان وەک یەک هەڵسوکەوتیان لەگەڵ بگرێت، وە دەستکەوتەکانی خۆشگوزەرانی بەشێوەیەکی دادپەروەرانە دابەش بکرێت.

لە گەلێک کۆمەڵگەدا خێزان بەرپرسە لە یارمەتیدانی ئەندامانی تری خێزانەکە کاتێک پێوستییان بە یارمەتی دەبێت. لە نەرویجیش یارمەتیدانی خێزان و هاوڕێ لەکاتی پێوست شتێکی سروشتی و ئاسایییە، بەڵام ئەمڕۆ دەزگا فەرمییەکان بەشیکی زۆری ئەم بەرپرسیارییەتیەی گرتۆتە ئەستۆ.

کۆمەڵگەی خۆشگوزەرانی گەڵێک دەستکەوت بۆ دانیشتووانەکەی دابین دەکات. بەڵام زۆر گرنگە کە بەڕوونی بزانین کە دانیشتووانیش لە کۆمەڵگەی خۆشگوزەرانیدا ئەرکیان هەیە.
مەرجێکی بنەڕەتی بۆ ئەوەی کۆمەڵگەی خۆشگوزەرانی بەڕێکوپێکی بەڕێوە بچێت بریتییە لە متمانە. متمانەبوون بە کەسێک بە مانای ئەوە دێت کە بڕوای پێبکەیت. ئێمە دەبێت بڕوا و متمانەمان بەوە هەبێت کە لە کاتی پێوستیدا ئامادەکارییەکان و یارمەتیەکانی کۆمەڵگەی خۆشگوزەرانی بەردەست دەبێت و پێمان دەگات. دەوڵەت و شارەوانییەکانیش لە لای خۆیانەوە دەبێت بڕوا و متمانە بە دانیشتووان بکەن کە زانیاری ڕاست دەدەن و خراپ دەستکەوتەکانی خۆشگوزەرانی بەکارناهێنن.