ኣብ ኖርወይ ስራሕ ክትደሊ ከለኻ ዝተፈላለየ ኣማራጽታት ኣሎካ፦

• መርበባት ርክብ ምጥቃም
• ኢንተርኔት፦ nav.no ከምኡ’ውን finn.no
• ግዜያዊ ሰራሕተኛ ዝቘጽራ ትካላት

ብዙሓት ኣስራሕቲ መወከሲ ዝኾኑ ሰባት ክህልዉኻ ኣገዳሲ ኮይኑ ይስምዖም። ነቶም ናይ ቀደም ኣስራሕቲ እቲ ኣመልካቲ ኣብቲ ስራሕ ከመይ ከም ዝነበረ ይውከሱዎም። ናይ ቀደም ሓላፊኻ ወይ መሳርሕትኻ ዝነበረ ሰብ ጽቡቕ መወከሲ ክኸውን ይኽእልዩ።

ኣብ ኖርወይ ናይ መጀመርያ ስራሕ ምርካብ ኣጸጋሚ ክኸውን ይኽእል’ዩ፡ ምኽንያቱ ክምስሩልካ ዝኽእሉ ሰባት ስለ ዘይብልካ ወይ መርበብ ርክባትካ ጸቢብ ስለ ዝኾነ። ስለዚ፡ ኣብ ናይ ስራሕ ቦታ ተሞክሮ ንምውሳድ ንውሱን እዋን ምስራሕ ወይ ኣብ ገለ ዓይነት ኮርስ (ስልጠና) ወይ ተመሳሳሊ ምስታፍ ጠቓሚ ክኸውን ይኽእል’ዩ። ሓደ ሰብ ብመንገዲ ልምምድን ዝተፈላለየ ንኣሽቱ ስራሓት ብምፍጻምን ነቲ መርበብ ርክቡ ከማዕብልን መወከስታት ከጥርን ይኽእል።

ካብ ሱሳ ክሳብ ሰማንያ ሚእታዊት ናይቲ ኣብ ኖርወይ ዝርከብ ስራሕ መወዓውዒ ኣይግበረሉን’ዩ፡ የግዳስ ብመርበብ ርክባት ከም ዝመሓላለፍ’ዩ ዝዝረብ። መርበብ ርክባትና ክብሃል ከሎ ኵላቶም ንፈልጦም፡ ንራኸቦምን ምስኣቶም ርክብ ዘሎና ሰባትን’ዮም። መርበብ ርክባታና ብስድራቤትና፡ ብኣዝማድና፡ ብንፈልጦም ሰባት፡ ብመሳርሕትና፡ ብጐረባብትና፡ ብመምህራንናን ብኣለይቲ ጕዳይናን ዝቘመ ክኸውን ይኽእል።

• ኣብ ሃገርካ ስራሕ ምርካብ ማዕረ ኽንደይ’ዩ ልሙድ፧
• ኣብ ኖርወይ ስራሕ ትረኽበሉ ዝተፈላለየ መንገድታት ተዘራረቡ።
• ናብ ኖርወይ ቅድሚ ምምምጻእካ ኣብ መርበብ ርክብካ በዓል መን ነይሮም፧ ኣብዚ ሕጂ እዋንከ ኣብ መርበባት ርክብካ በዓል መን ኣለው፧
• ኣብ ኖርወይ ዓቢ መርበብ ርክብ የድልየካዶ፧ ነዚኸ ብኸመይ ኢኻ ትረኽቦ፧