ناروے میں ملازمت تلاش کرتے ہوئے آپ کو کئی مواقع حاصل ہوتے ہیں:

• اپنا نیٹ ورک استعمال کرنا
• انٹرنیٹ: nav.no اور finn.no
• عارضی ملازمت دلانے والی ایجنسیاں

بہت سے آجر ریفرنسز یعنی حوالوں کو اہمیت دیتے ہیں۔ وہ پچھلے آجروں سے پوچھتے ہیں کہ ایک امیدوار ان کے پاس کام کرتے ہوئے کیسا تھا۔ پچھلا باس یا ساتھی کارکن آپ کے لیے اچھے حوالے مہیا کر سکتا ہے۔

ناروے میں پہلی ملازمت حاصل کرنا مشکل ہو سکتا ہے کیونکہ انسان کے پاس حوالے نہیں ہوتے یا اس کا نیٹ ورک چھوٹا ہوتا ہے۔ اس لیے کسی ادارے میں کچھ عرصہ تجربہ دلانے والی ملازمت کرنا، کچھ کورس وغیرہ کرنا فائدہ مند ہو سکتا ہے۔ تجربہ دلانے والی ملازمت اور مختلف چھوٹی ملازمتوں سے انسان اپنا نیٹ ورک بڑھا سکتا ہے اور حوالے حاصل کر سکتا ہے۔

کہا جاتا ہے کہ ناروے میں ساٹھ سے اسّی فیصد ملازمتیں مشتہر نہیں کی جاتیں بلکہ لوگوں کو یہ ملازمتیں اپنے نیٹ ورک کے ذریعے مل جاتی ہیں۔ نیٹ ورک سے مراد وہ سب لوگ ہیں جنہیں ہم جانتے ہوں، جن سے ملتے ہوں اور جن سے رابطے میں ہوں۔ ہمارے نیٹ ورک میں اہلخانہ، رشتہ دار، دوست، واقف، ساتھی کارکن، ہمسایے، اساتذہ اور کیس آفیسرز شامل ہو سکتے ہیں۔

• آپ کے وطن میں ملازمت حاصل کرنے کا عام طریقہ کیا ہے؟
• ناروے میں ملازمت حاصل کرنے کے مختلف طریقوں کے بارے میں بات کریں۔
• ناروے آنے سے پہلے آپ کے نیٹ ورک میں کون کون تھا؟ اب آپ کے نیٹ ورک میں کون کون ہے؟
• کیا آپ کو ناروے میں اپنا نیٹ ورک بڑھانے کی ضرورت ہے؟ آپ یہ کیسے ممکن بنائیں گے؟