Istida

For lenge, lenge sidan var den nordlege delen av Europa dekt av eit islag som var opptil tre tusen meter tjukt. Etter kvart byrja temperaturen å stige, og litt etter litt smelta isen.

Steinalderen (10 000 f.Kr.–2000 f.Kr.)

For om lag fire tusen år sidan byrja ein med jordbruk i Noreg.

Bronsealderen (1800 f.Kr.–500 f.Kr.)

Rike bønder kunne etter kvart få tak i reiskapar, våpen og smykke laga av bronse. Bøndene byrja å bruke hesten som trekkdyr, og kvinnene lærte å spinne garn og veve tøy av ulla til sauen.

Denne perioden kallar vi for bronsealderen. Klimaet i Noreg var mildare i bronsealderen enn det er i dag.

Jernalderen (500 f.Kr.–1050 e.Kr.)

I denne perioden blei klimaet likt det vi kjenner i dag. Menneska i Noreg lærte seg å lage jern av smelta jernmalm som dei fann i myrene og brukte jernet til å lage reiskapar og våpen. Med desse reiskapane blei det lettare å dyrke jorda, og det blei meir mat. Folketalet auka. Denne perioden kallar vi jernalderen.

Vikingtida (800 e.Kr.–1050 e.Kr.)

Dei rikaste og mektigaste bøndene budde på dei største gardane. Desse storbøndene blei kalla hovdingar. Dei hadde soldatar som forsvara landområda deira. På slutten av 700-talet reiste nokre av hovdingane frå Noreg til andre land i Europa. Nokre var dyktige handelsfolk, men dei kriga og plyndra òg. Dei blei kalla vikingar.

I år 872 blei vikingen Harald Hårfagre konge over heile Noreg.

Religionen til vikingane var knytt til forteljingar om dei norrøne gudane og korleis dei kunne hjelpe til med god avling, fruktbarheit og krigføring. Nokre av vikingane blei kjende med kristendomen på reisene sine i Europa og tok den nye trua med seg heim. Kristendomen blei innført i Noreg på 1000-talet. Året 1030 er eit viktig år i norsk historie. Det året stod det eit slag på Stiklestad i Trøndelag. Der slost den kristne Olav Haraldsson mot mektige hovdingar frå Trøndelag som trudde på den gamle vikingreligionen. Sjølv om Olav tapte slaget, fekk kristendomen meir og meir fotfeste hos folk. Etter kvart tok kristendomen over for den gamle norrøne gudetrua.

• Kjenner du til den tidlegaste historia i heimlandet ditt?
• Kan du samanlikne kva som hende i dei ulike tidsperiodane i Noreg, med det som hende i heimlandet ditt på same tid?
• Hadde du høyrt om vikingane før du kom til Noreg?
• Hadde vikingane noko å seie for historia til heimlandet ditt?
• Snakk saman om korleis og kvifor menneska kunne skifte frå éin religion til ein annan. Korleis kunne det prege livet til menneska? Har det skjedd noko liknande i heimlandet ditt?