Të drejtat e njeriut janë të drejta universale. Ato janë të drejta që i kemi ne të gjithë si qenie njerëzore – jo sepse jetojmë në një pjesë të caktuar të botës ose se i përkasim një feje ose grupi të caktuar etnik. Kjo është arsyeja pse i quajmë të drejtat e njeriut të drejta universale.

OKB-ja miratoi Deklaratën Universale për të Drejtat e Njeriut në vitin 1948. Të gjitha (193) shtetet anëtare të OKB-së e kanë miratuar këtë deklaratë. Një pjesë e madhe e Deklaratës Universale të OKB-së për të Drejtat e Njeriut është përfshirë në ligjet norvegjeze.

Ndër të tjera, Deklarata e të Drejtave të Njeriut thotë se:

• të gjithë lindin të lirë dhe të barabartë në dinjitetin dhe të drejtat njerëzore
• të gjithë kanë të njëjtat të drejta njerëzore, pavarësisht nga gjinia, feja, raca, opinionet politike, kombësia etj.
• të gjithë kanë të drejtën e lirisë dhe sigurisë personale
• të gjitha format e torturës janë të ndaluara
• të gjithë duhet të kenë mbrojtjen e procesit të duhur
• të gjithë kanë të drejtë të ndikojnë në situatën politike në vendin e tyre duke votuar në zgjedhjet e lira të mbajtura me votim të fshehtë

• A jeni njohur me Deklaratën Universale të OKB-së për të Drejtat e Njeriut?
• A mendoni se Deklarata e të Drejtave të Njeriut ka ndonjë ndikim në kushtet e jetesës së njerëzve në mbarë botën?
• A i respektojnë të gjitha vendet në botë dispozitat e përcaktuara në Deklaratë?