فطرت اور ماحول کے تحفظ کا مطلب یہ ہے کہ فطرت اور انواع حیات کے نظاموں کو سلامت رکھنے کے لیے کام کیا جائے۔ اس کا تعلق فطرت میں تبدیلیوں کو محدود رکھنے اور ان نقصانات کی اصلاح اور مرمّت سے بھی ہے جو انسانوں نے فطرت کو پہنچائے ہیں۔ فطرت اور ماحول کے تحفظ سے یہ یقینی ہو گا کہ انسانوں، جانوروں اور پودوں کو زندگی کا اچھا ماحول میسّر ہو گا، آنے والے زمانوں میں بھی۔

دوبارہ استعمال اور ری سائیکلنگ

دوبارہ استعمال کا مطلب یہ ہے کہ ہمیں مختلف وجوہ سے جن چیزوں کی اب ضرورت نہ ہو، انہیں دوسرے لوگ استعمال کر لیں۔ ری سائیکلنگ کا مطلب یہ ہے کہ چیزوں کو کھول کر کے خام میٹریل الگ کر لیا جائے اور ان چیزوں کو نئے سرے سے بنا لیا جائے یا انہیں پگھلا کر نئی چیزیں بنا لی جائیں۔ حالیہ سالوں میں دوبارہ استعمال بہت مقبول ہو چکا ہے۔ بہت سے لوگ چیزیں خریدنے اور استعمال کے بعد چیزیں پھینک دینے کی ذہنیت کے حوالے سے زیادہ باشعور طرز عمل اپنانا چاہتے ہیں اور استعمال شدہ کپڑے، فرنیچر اور دوسری چیزیں لینے کا انتخاب کرتے ہیں۔

کوڑے کی چھانٹی

ناروے کا ہر باشندہ سال میں 400 کلوگرام سے زیادہ کوڑا پھینکتا ہے۔ بہت سی بلدیات میں لوگ اپنے کوڑے میں سے مختلف قسموں کی چیزیں الگ چھانٹتے ہیں۔ اسے کوڑے کی چھانٹی (kildesortering) کہتے ہیں۔ کچھ چیزوں کو ہم گھر میں چھانٹ کر کوڑے میں ڈال سکتے ہیں اور کچھ چیزیں ری سائیکلنگ کے خاص مقامات تک پہنچائی جاتی ہیں۔ ان مقامات پر مختلف قسموں کا کوڑا ری سائيکل کرنے کے لیے مخصوص کنٹینر ہوتے ہیں۔ بہت سی بلدیات میں بڑے بڑے ری سائیکلنگ سٹیشن بھی ہیں جہاں ہم وہ بڑی چیزیں پہنچا سکتے ہیں جنہیں ہم پھینکنا چاہتے ہوں جیسے فرنیچر، واشنگ مشین، باغیچے کا کوڑا اور پینٹ کے ڈبے۔

خوراک کا ضیاع

خوراک کا ضیاع (matsvinn) اسے کہتے ہیں کہ کھانے کے قابل خوراک کو پھینک دیا جائے یا اسے انسانی خوراک کی بجائے کسی اور مقصد کے لیے استعمال کیا جائے۔ عالمی سطح پر پیدا کی جانے والی خوراک کا ایک تہائی حصہ پھینک دیا جاتا ہے۔ ناروے میں ہم ہر سال 4 لاکھ ٹن سے زیادہ کھانے کے قابل خوراک پھینکتے ہیں۔ خوراک کی انڈسٹری، سودا سلف کی دکانوں، ریستورانوں اور خوراک فروخت کرنے والے دوسرے مقامات کے ساتھ ساتھ گھروں میں بھی خوراک پھینکی جاتی ہے۔ ہر سال دنیا بھر میں اتنی زیادہ خوراک پھینکی جاتی ہے جس سے دنیا کے سب بھوکے انسانوں کی ضرورت پوری ہو سکتی تھی۔

ٹرانسپورٹ اور ماحول

ناروے میں گرین ہاؤس گیسوں کے تقریباً 30 فیصد اخراج کے لیے ٹرانسپورٹ ذمہ دار ہے۔ ٹرانسپورٹ کی وجہ سے ہونے والے اخراج میں سے تقریباً نصف کے لیے سڑکوں کی ٹریفک ذمہ دار ہے۔ ناروے میں سمندری جہاز اور ماہی گیری بھی گرین ہاؤس گیسوں کے اخراج کے بڑے اسباب ہیں۔ٹرانسپورٹ عالمی سطح پر گرین ہاؤس گیسوں کے تقریباً 20 فیصد اخراج کے لیے ذمہ دار ہے۔

ناروے میں یہ ایک ہدف ہے کہ 2025 سے مارکیٹ میں نئی فروخت ہونے والی تمام کاریں صفر اخراج والی کاریں ہوں گی۔ صفر اخراج والی کار گرین ہاؤس گیسیں خارج نہیں کرتی۔ یہ بھی ایک ہدف ہے کہ بڑے شہروں میں لوگوں کی ٹرانسپورٹ میں اضافے کی تمام ضرورت کو پبلک ٹرانسپورٹ، سائیکل یا پیدل سفر کے ذریعے پورا کیا جائے گا۔ لہذا ملکی باشندوں کی تعداد بڑھنے کے باوجود کاروں کی ٹریفک میں اس کے برابر اضافہ نہیں ہو گا۔

• فطرت اور ماحول کے تحفظ کے لیے ہم میں سے ہر فرد کیا کر سکتا ہے؟
• دوبارہ استعمال اور ری سائیکلنگ کے بارے میں آپس میں بات کریں۔
• کیا آپ کبھی استعمال شدہ چیزیں خریدتے ہیں؟ کیوں خریدتے ہیں یا کیوں نہیں خریدتے؟
• کوڑے کی چھانٹی کے بارے میں آپس میں بات کریں۔ ہم کوڑا کیوں چھانٹتے ہیں؟ اگر ہم کوڑے کی چھانٹی نہ کریں تو کیا ہو گا؟
• خوراک کے ضیاع کے بارے میں آپس میں بات کریں۔ ہم اتنی زیادہ خوراک کیوں پھینکتے ہیں؟ کیا آپ خوراک پھینکتے ہیں؟ کیوں پھینکتے ہیں یا کیوں نہیں پھینکتے؟ خوراک پھینکنے میں کمی لانے کے لیے ہم کیا کر سکتے ہیں؟
• پرائیویٹ کار کے استعمال اور پبلک ٹرانسپورٹ کے استعمال پر بات کریں اور موازنہ کریں۔ کیا ناروے میں سب لوگوں کے لیے پبلک ٹرانسپورٹ استعمال کرنا برابر حد تک ممکن ہے؟ ایسا کیوں ہے یا ایسا کیوں نہیں ہے؟