ኖርዌይ፡ ለሁሉም በእኩልነት፡ የሚል በማህበራዊ ደህንነት ላይ የተገነባ፡ ሥርዓት ያላት ኣገር ናት። ይህ ማለት፡ ሁሉም ሰዎች፡ በእኩል አስፈላጊ ስለሆኑ፡ ሁሉም ጥሩ ሕይወት የመኖር ዕድል ሊኖራቸው ይገባል። መንግስትና ኣስተዳድሩም የህዝቡ ደህንነትን የመጠበቅ ግዴታ ኣላቸው። ስለዚህ፡ ኖርዌይ የማህበራዊ ደህንነት መንግስት ነው፡ እንላለን።

የማሕበራዊ ደህንነት ሥርዓት በቀላሉ የመጣ አይደለም። የኖርዌይ የማህበራዊ ደህንነት ሁኔታ፡ በ100 ዓመታት ውስጥ፡ በጥቅም ላይ ጥቅም በመጨመር የተገነባ ሥርዓት ነው። ሁሉም የጥቅማ-ጥቅሞች ዕቅዶች ብዙ ገንዘብ ይፈጃሉ። ፖለቲከኞቹ፡ የትኞቹ የጥቅም መርሃ ግብሮች እንደሚዘጋጁ ይወስናሉ። ስለሆነም፡ ለውጥ ሊመጣ የሚችለው፡ የትኞቹ ፓርቲዎች ስልጣን ላይ ባሉና የሕብረተሰቡ የፋይናንስ ኣቅም ላይ ተመስርቶ ነው።

የማህበራዊ ደህንነት ሥርዓት የሚሠራው፡ በተቻለ መጠን፡ ብዙ የመንግስትን ግብር የሚከፍሉ ሠራተኞች ሲኖሩ ነው። ብዙ ሰዎች ደግሞ፡ እራሳቸውን ችለው ገለልተኛ መሆን ይፈልጋሉ። የማህበራዊ ደህንነት ሥርዓት፡ እገዛ ለሚያስፈልጋቸው የገንዘብ እርዳታ ያደርጋል።

የማህበራዊ ደህንነት ሥርዓት አጠቃቀም፡ በአብዛኛው በመተማመን ላይ የተመሠረተ ነው። ማዕከላዊው መንግስት እና ህዝብ እርስ በእርስ ይተማመናሉ። ሕዝቡ፡ ማዕከላዊ መንግሥት አስፈላጊ ሆኖ ሲገኝ እንደሚረዳቸው ያምናሉ፣ ማዕከላዊው መንግሥት ደግሞ፡ ሕዝቡ የደህንነት ሥርዓቱን አላግባብ እንደማይጠቀሙበት ይተማመናል።

የኖርዌይ የሠራተኛ እና የደህንነት አስተዳደር (NAV)

በኖርዌይ እያንዳንዱ ኣስተዳደር የናቭ ጽሕፈት ቤት አለው። ሥራ ለማግኘት ብቃት ይኖረን ዘንድ እርዳታ፣ በሕመም ጊዜ ወይም በሌሎች አስቸጋሪ ጊዜ፡ የገንዘብ ድጋፍ፡ ካስፈለገን የናቭ ጽሕፈት ቤት ሊረዳን ይችላል። ናቭ፡ በኖርዌይ ለሚገኙት የማህበራዊ ደህንነት ተቋማትን ኃላፊነት አለበት። በተጨማሪም፡ ናቭ፡ ማህበራዊ እርዳታን በማካሔድ፡ በሥራ አጥነት ግዜ የሚከፈል ገንዘብ፣ በህመም ግዜ ደመወዝ፣ የጡረታ ክፍያ፣ ለልጆች ዋስትና ተብሎ የተመደበው ሒሳብ እና ለገንዘብ እንክብካቤ መርሃ ግብር ለመሳሰሉት ሌሎች ነገሮች ኃላፊነት አለበት።

ናቭ ከብሔራዊ በጀት በግምት አንድ ሦስተኛ ያክል ያስተዳድራል፡ ወደ 22,000 የሚጠጉ ሠራተኞች አሉት።

የማህበራዊ ደህንነት ማህበረሰብ፡ የሥራ ዕድል ይፈጥራል

የማህበራዊ ደህንነት ሥርዓት፡ ከፍ ያለ የሠራተኞች መጠን ያስፈልጉታል። በኣሁኑ ግዜ፡ በኖርዌይ ከሚሠሩት ሰዎች ሰላሳ በመቶው የሚሆኑ በመንግስት ዘርፍ ውስጥ ይሠራሉ። የኖርዌይ ደህንነት ማህበረሰብ በደንብ እንዲተገበር፡ ብዙ የተለያዩ የሙያ ዘርፍ ያላቸው ሰራተኞች ያስፈልጉታል።

• እኩልነት ምንድን ነው? ደህንነት ምንድነው? ጥሩ ሕይወት ምንድን ነው?
• በኖርዌይ ኅብረተሰብ ያለውን ማህበራዊ ደህንነት ሥርዓት ተወያዩ።
• በኖርዌይ የማህበራዊ ደህንነት ሥርዓት፡ የናቭ (NAV) አስፈላጊነት ተወያዩ።
• ናቭ፡ የኖርዌይ ብሔራዊ በጀት አንድ ሦስተኛ ያስተዳድራል። ይህ ስለ ማህበርዊ ደህንነት ሥርዓት ምን ያመለክታል? እንዲሁም ገንዘቡ ከየት ይመጣል?