Ny i Noreg

• Kvifor flyttar menneske til andre land? Kva ønske kan dei ha for livet i det nye landet?
• Kva visste du om Noreg før du kom hit? Kvar fekk du informasjon frå? Stemde informasjonen?
• Dersom du samanliknar Noreg og landet du kjem frå, kva tenkjer du er dei største likskapane? Kva er dei største ulikskapane?
• Korleis trur du at eit typisk liv i Noreg er?
• Kva veit du eigentleg om nordmenn?

Til alle tider har menneske av ulike årsaker flytta på seg og busett seg på nye stader og i nye land. Somme flyttar av økonomiske årsaker, på grunn av jobb eller kjærleik, andre flyktar frå krig. Somme er eventyrlystne og vil berre ha forandring, eller dei vil studere ved eit spesielt universitet.

Det bur ca. 5,4 millionar menneske i Noreg. Om lag éin million av dei er fødde i utlandet eller har foreldre som er fødde i utlandet. Det utgjer rundt atten prosent av innbyggjarane i Noreg. Om lag halvparten av innvandrarane i Noreg har norsk statsborgarskap.

Samanlikna med situasjonen i dag, var menneska i Noreg svært fattige for litt over hundre år sidan. Sjølv om folk var fattige, hadde Noreg likevel den høgaste levealderen i verda. I dag er Noreg eit rikt land. Menneska her har høgare levestandard enn i dei fleste andre land i verda. Alle lever ulike liv, men likevel har menneska som bur her, mykje til felles.

• Dei fleste har ein grei økonomi. Dei eig eller leiger ein bustad, har nok mat og klede, og har til og med litt pengar til overs.
• Velferdsstaten gjev hjelp og tenester til innbyggjarar som treng det.

Kjelde: SSB