ناروے میں نئے لوگ

• لوگ دوسرے ملکوں کو کیوں منتقل ہوتے ہیں؟ نئے ملک میں زںدگی کے لیے ان کی خواہشات کیا ہو سکتی ہیں؟
• یہاں آنے سے پہلے آپ ناروے کے بارے میں کیا جانتے تھے؟ آپ کو معلومات کہاں سے ملیں؟ کیا یہ معلومات درست تھیں؟
• اگر آپ اپنے اصل ملک کا موازنہ ناروے سے کریں تو آپ کے خیال میں ان دونوں ملکوں میں اہم مشترک باتیں کیا ہیں؟ ان کے درمیان کونسی اہم باتیں مختلف ہیں؟
• آپ کے خیال میں ناروے میں ایک عام زندگی کیسی ہے؟
• آپ نارویجنوں کے بارے میں کیا جانتے ہیں؟

انسان ہمیشہ سے اپنے علاقے چھوڑ کر نئی جگہوں اور نئے ملکوں میں آباد ہوتے رہے ہیں۔ اس کی مختلف وجوہ ہو سکتی ہیں۔ کچھ لوگ معاشی حالات، روزگار یا محبت کی وجہ سے نئی جگہوں پر جا بستے ہیں اور کچھ لوگ جنگ کی وجہ سے۔ کچھ لوگوں کی فطرت میں مہم جوئی ہوتی ہے اور وہ محض تبدیلی چاہتے ہیں یا وہ کسی خاص یونیورسٹی میں پڑھنا چاہتے ہیں۔

2024 کے آغاز میں ناروے کی آبادی تقریباً 55 لاکھ ہے۔ ان میں سے 10 لاکھ سے زیادہ افراد بیرون ناروے پیدا ہوئے یا ان کے والدین بیرون ناروے پیدا ہوئے۔ یہ تعداد ناروے کی آبادی کا تقریباً 20 فیصد ہے۔ ناروے میں تارکین وطن کی تقریباً نصف تعداد کو نارویجن شہریت حاصل ہے۔

آج کے زمانے سے موازنہ کیا جائے تو تقریباً سو سال پہلے ناروے میں بہت غربت تھی۔ لیکن غربت کے باوجود ناروے کے لوگ دنیا بھر میں طویل ترین عمر پاتے تھے۔ آج ناروے ایک امیر ملک ہے۔ یہاں کے لوگ دنیا کا بلند ترین معیار زںدگی رکھتے ہیں۔ سب لوگوں کی زںدگی مختلف ہوتی ہے لیکن پھر بھی یہاں رہنے والے لوگوں میں بہت سی باتیں مشترک ہیں۔

• اکثر لوگوں کے مالی حالات مناسب ہیں۔ لوگ ذاتی گھر یا کرایے کے گھر میں رہتے ہیں، ان کی خوراک اور لباس کی ضروریات اچھی طرح پوری ہو جاتی ہیں اور پھر بھی ان کے پاس کچھ پیسے بچ رہتے ہیں۔
• فلاحی ریاست اپنے باشندوں کو ضرورت ہونے پر مدد اور خدمات دیتی ہے۔

ماخذ: SSB