ህዝቢ ሳመ ደቀባት ኖርወይ እዮም። ህዝቢ ሳመ ኣብ ኣርባዕተ ሃገራት ማለት ኣብ ኖርወይ፡ሽወደን፡ ፊንላንድን ሩስያን ዝነበሩ እዮም። ህዝቢ ሳመ ኣብ ኖርወይ ብጥንታውነቶም ቀዳማይ ቦታ ዝሓዙ ጕጅለ ህዝቢ ኮይኖም ዝተፈላለየ ቋንቋታት ሳሚስክ ድማ ኣሎዎም። ቋንቋ ሳሚስክ ካብ ቋንቋ ኖርወይ ፈጺሙ ዝተፈልየ እዩ። ሓደ ኖሽክ ቋንቋ ጥራይ ዝዛረብ ሰብ ቋንቋ ሳሚስክ ፈጺሙ ክርድኦ ኣይክእልን’ዩ። ሎሚ ዳርጋ ኩላቶም ኣብ ኖርወይ ዘለዉ ህዝቢ ሳመ ንቋንቋ ኖርወይ ይመልኩዎ እዮም። ብዙሓት’ውን ሳሚስክ ይዛረቡ እዮም።

ሃገራዊ መዓልቲ ህዝቢ ሳመ 6 ለካቲት እያ። ኣብዚ መዓልቲ እዚ ባንዴራ ህዝቢ ሳመ ኣብ ምሉእ’ታ ሃገር ተንበልብል። ህዝቢ ሳመ ኮፍታ/kofta ዝብሃል ባህላዊ ክዳውንቲ ኣሎዎም። ክሳብ ሕጂ ሳመነ ኣብ ፍሉይ ኣጋጣሚታት ንኣብነት ኣብ መርዓ ኮፍተ ይጥቀሙሉ እዮም። ገለ ካብኣቶም ድማ ንኮፍተ ኣብ መዓልታዊ ህይወቶም ይጥቀሙሉ እዮም።

ቅድሚ ኣስታት ሚእትን ሓምሳን ዓመት ኣቢሉ ኖርወጃውያን ንህዝቢ ሳመ “ኖርወጃውያን” ክገብሩዎም ፈቲኖም ነይሮም። እቶም ቈልዑ በስገዳድ ናብ ቤትትምህርቲ ኖርወጃውያን ክኸዱ ተገይሮም፡ ቋንቋ ሳሚስክ ክመሃሩ ኣይፍቀደሎምን ነይሩ። ኣብ 1959 ዓ.ም ኣብ ቤትትምህርቲ ቋንቋ ሳሚስክ ምጥቃም ተፈቒዱ። ኣብ 1902 ዓ.ም ቋንቋ ኖሽክ ዝዛረቡን ዘንብቡን ዝጽሕፉን ዜጋታት ኖርወይ ጥራይ’ዮም መሬት ክዕድጉ ዝኽእሉ ዝብል ሕጊ ወጺኡ። እዚ ሕጊ እዚ ክሳዕ 1965 ዓ.ም የገልግል ነይሩ። ሎሚ ዘሎ ኵነታት ግን ፈጺሙ ዝተፈልየ እዩ። ኣብ 1989 ዓ.ም ባይቶ ህዝቢ ሳመ ተኸፊቱ። ባይቶ ህዝቢ ሳመ ንመሰላት እቶም ኣብ ኖርወይ ዝነብሩ ህዝቢ ሳመ ብፍላይ ከኣ ምስ ባህልን ትምህርትን ብዝተሓሓዝ ዝሰርሕ’ዩ። ኣብ ነፍስወከፍ ኣርባዕተ ዓመት ንባይቶ ህዝቢ ሳመ ዝምልከት ምርጫ ይካየድ።

• ኣብ ሃገርካ ደቀባት ዝብሃሉ ኣለዉዶ፧ ኵነታት ህይወቶምከ ከመይ እዩ፧
• ብዛዕባ ኵነታት ዝተፈላለዩ ኣባላት ውሑዳን ኣህዛብ ተዘራረቡ።