ጤና

• ለእናንተ ጥሩ ጤና ምን ማለት ነው?
• ለአገሪቱ ነዋሪዎች የጤና ኃላፊነት መውሰድ የሚገባው ማነው?
• የራሳችንን ጤና ለመንከባከብ ምን ማድረግ እንችላለን?
• ቀድሞ ትኖሩበት ከነበረው አገር ይልቅ፡ በኖርዌይ መኖር ከመጣችሁ ወዲህ፡ የራሳችሁን ጤና ከመንከባከብ ባሻገር ስለ ተጨማሪ ነገር ማሰብ ይኖርባችኋል ማለት ነው?
  ወደ ዶክተር ስትሄዱ ምን ትጠብቃላችሁ?
• በየትኞቹ ሁኔታዎች ዶክተር ማየት አስፈላጊ ነው ብለው ያስባሉ?

ጥሩ ጤንነት - ከበሽታዎች አለመኖር የበለጠ?

አንዳንድ ሰዎች ጥሩ ጤና ማለት አለመታመም ማለት ነው ይላሉ። አንዳንዶች ደግሞ ጥሩ ጤና ማለት ምቾትና በሕይወት ደስተኛ መሆን ማለት ነው ይላሉ። ጥሩ ጤናን በተመለከተ ሁለቱም ፍቺዎች ትክክል ናቸው። የመጀመርያው ትርጉም ምናልባት ከባድ በሽታ እና ድህነት በተስፋፋባቸው ማህበረሰቦች ውስጥ የበላይ ይሆናል። በሌሎች ማህበረሰቦች፣ ለአብዛኛዎቹ በሽታዎች መድሀኒት ሲገኝ እና አስፈላጊው የህክምና እርዳታ ለሁሉም በተሟሉባቸው ኣከባቢዎች፡ ጥሩ ጤንነት ማለት በአካል እና በአእምሮ ጤናማ ከመሆን የበለጠ እንደሆነ ይሰማቸዋል።

ለጤናችን ኃላፊነቱን የሚወስደው ማነው?

ቀደም ብሎ፡ ለሕመምተኞች ጤንነት ኋላፊነት ያለበት የጤና አገልግሎቱ እንደሆነ ያስቡ ነበር። ከቅርብ ዓመታት ወዲህ ግን፡ ለጤንነታችን ትልቅ ኃላፊነት እንዳለብን ማሰብ የተለመደ ሆኗል። ህይወታችንን ለመኖር የምንመርጥበት መንገድ በጤናችን ላይ ተጽእኖ ይኖረዋል። የጤና አገልግሎት ምክር እና መመሪያ የመስጠት ሃላፊነት አለበት፡ ነገር ግን ምክሩን መከተል የኛ ሃላፊነት ነው። በሽታዎችን ለመከላከል እና ለማከም በኢንተርኔት፣ በዶክተር ወይም በፋርማሲ ውስጥ መረጃ ማግኘት ይቻላል።

በብዙ ሃገራት፡ ሕመምተኞች የእነርሱን የሕክምና ጉዳይ የመወሰን ስልጣን ያለው ዶክተሩ እንደሆነ አድርገው ያስባሉ። እንዲሁም፡ አንዳንድ ሕመምተኞች ዶክተሩን የሆነ መድኃኒት ካላዘዘላቸው አይለቁትም። በኖርዌይ ዶክተሮች ከሕመምተኞቻቸው ጋር የተለያዩ የሕክምና ዘዴዎችን እና የክትትል መንገዶችን ላይ ውይይት ማድረግ የተለመደ ነው።