صحت

• آپ کے لیے اچھی صحت کا کیا مطلب ہے؟
• ایک ملک کے باشندوں کی صحت کی ذمہ داری کس پر ہوتی ہے؟
• ہم اپنی صحت برقرار رکھنے کے لیے خود کیا کر سکتے ہیں؟
• کیا ناروے میں رہتے ہوئے اپنی صحت برقرار رکھنے کے لیے آپ کو ان باتوں سے کچھ مختلف باتیں ذہن میں رکھنی ہوں گی جو آپ اپنے ملک میں رہنے کے دوران کرتے تھے؟
• جب آپ ڈاکٹر کے پاس جاتے ہیں تو آپ کی کیا توقعات ہوتی ہیں؟
• آپ کے خیال میں کن حالات میں ڈاکٹر سے رجوع کرنا ضروری ہے؟

اچھی صحت - محض بیماری کے نہ ہونے سے بڑھ کر؟

کچھ لوگ کہیں گے کہ اچھی صحت کا مطلب یہ ہے کہ انسان بیمار نہ ہو۔ کچھ لوگ کہیں گے کہ اچھی صحت کا مطلب یہ ہے کہ انسان کے حالات اچھے ہوں اور وہ اپنی زندگی سے مطمئن ہو۔ اچھی صحت کی تعریف کرنے کے یہ دونوں طریقے درست ہیں۔ جن معاشروں میں خطرناک بیماریاں اور غربت زندگی کا ایک بڑا حصہ ہوں، وہاں شاید پہلی تعریف زیادہ عام ہو۔ جبکہ دوسرے معاشروں میں جہاں زیادہ تر بیماریوں کی دوائیاں مل جاتی ہوں اور سب لوگوں کے لیے ضروری طبی مدد حاصل کرنا ممکن ہو، وہاں بہت سے لوگوں کی رائے یہ ہو گی کہ اچھی صحت کا مطلب محض جسمانی اور نفسیاتی طور پر صحتمند ہونے سے بڑھ کر کچھ ہے۔

ہماری صحت کی ذمہ داری کس پر ہے؟

پہلے لوگ اکثر یہ سوچتے تھے کہ مریضوں کی صحت کی ذمہ داری نظامˏصحت پر ہے۔ پچھلے کچھ سالوں میں یہ سوچ زیادہ عام ہو گئی ہے کہ ہماری صحت کی بہت زیادہ ذمہ داری خود ہم پر ہے۔ ہم جس طرح اپنی زندگی جینے کا انتخاب کریں، اس سے ہماری صحت پر اثر پڑتا ہے۔ نظام صحت کی ذمہ داری مشورہ اور رہنمائی دینا ہے لیکن ان مشوروں پر عمل کرنا ہماری ذمہ داری ہے۔ بیماریوں کی روک تھام اور علاج کے متعلق معلومات انٹرنیٹ پر، ڈاکٹر سے یا کیمسٹ سے ملتی ہیں۔

بہت سے ملکوں میں مریض اس چیز کے عادی ہیں کہ ڈاکٹر ایک بااختیار شخص ہوتا ہے جو علاج کا فیصلہ کرتا ہے۔ مریضوں کا عام تجربہ یہ بھی ہو سکتا ہے کہ ڈاکٹر سے ملاقات کے بعد انسان کبھی دوائیوں کے بغیر واپس نہیں جاتا۔ ناروے میں یہ عام ہے کہ مریض اور ڈاکٹر علاج اور خبرگیری کے مختلف امکانات پر بات چیت کرتے ہیں۔