Në një shoqëri të mirëqenies, qëllimi është që e gjithë popullata të mund të jetojë sa më mirë. Kjo përfshin të gëzojnë shëndet të mirë. Në Norvegji, ne kemi një shërbim të shëndetit publik. Kjo do të thotë që shteti merr përgjegjësinë që njerëzit të marrin trajtimin e nevojshëm, pavarësisht nga financat personale. Në dispozicion janë gjithashtu shërbime të ndryshme private shëndetësore. Ata që përdorin këto shërbime paguajnë vetë për trajtimin e tyre.

Mjeku i familjes

Në faqen e internetit helsenorge.no, mund të gjeni një mjek të përgjithshëm, mund të ndryshoni mjekun e familjes dhe të gjeni informacione të tjera të rëndësishme shëndetësore.

Mjeku specialist

• Mjeku specialist është, për shembull, një gjinekolog, një dermatolog, një mjek vesh-hundë-fyt ose specialist për sëmundjet e fëmijëve.
• Në përgjithësi mjeku i familjes ju rekomandon nëse keni nevojë të vizitoheni tek një specialist.

Pranimi në spital

• Mjeku vendos nëse keni nevojë të shtroheni në spital. Qëndrimi në spitalet publike është pa pagesë. Shteti mbulon të gjitha shpenzimet e trajtimit, ushqimit dhe akomodimit.
• Kur fëmijët shtrohen në spital, njëri nga prindërit qëndron zakonisht së bashku me fëmijën.

Trajtimi ambulator në spital

• Trajtimi ambulator/poliklinik do të thotë që ju trajtoheni në spital pa u shtruar. Vini për takimin tuaj dhe shkoni në shtëpi kur përfundon trajtimi.

Kujdesi i urgjencës

• Nëse ju ose një pjesëtar i familjes tuaj sëmuret ose pëson një lëndim në kohën kur zyra e mjekut tuaj të familjes është e mbyllur, duhet të kontaktoni repartin e urgjencës duke telefonuar 116 117.
• Nëse dikush sëmuret rëndë ose lëndohet dhe kërkon ndihmë të menjëhershme, duhet të telefononi numrin e urgjencës mjekësore 113.
• Flisni me qetësi dhe jepni informacione në rendin e mëposhtëm: Kush jeni? Çfarë ka ndodhur? Ku jeni?

Farmacia

• Shumica e ilaçeve mund të blihen vetëm në farmaci.
• Disa ilaçe, të tilla si qetësues të lehtë kundër dhimbjes, mund të blihen gjithashtu në dyqanin ushqimor ose në pikat e karburantit.
• Personat që punojnë në farmaci mund t'ju ndihmojnë të zgjidhni ilaçet dhe t'ju tregojnë se si t'i përdorni.
• Në shumë raste ju duhet një recetë nga mjeku për të blerë ilaçe. Receta tregon emrin e ilaçit dhe mënyrën e përdorimit të tij.
• Recetat shpesh janë elektronike, ndonjëherë janë në letër. Të gjitha farmacitë kanë qasje tek recetat dixhitale.
• Ju duhet të identifikoheni (me kartë bankare, leje drejtimi, pasaportë ose kartë identiteti) në farmaci kur do të merrni ilaçet e recetës.
• Nëse keni një sëmundje serioze dhe kronike, mund të merrni ilaçe, produkte ushqyese dhe furnizime mjekësore me recetë të rimbursueshme. Ju paguani një pjesë të vogël të kostos.

Detyra e konfidencialitetit

• Të gjithë ata që punojnë në shërbimin shëndetësor janë të detyruar të ruajnë konfidencialitetin. Kjo do të thotë se ata nuk mund t'ua përcjellin të tjerëve informacionin tuaj pa marrë pëlqimin tuaj. Kështu që ju mund të flisni lirshëm me mjekun për problemet tuaja. Ju nuk duhet të keni frikë se dikush do të marrë vesh atë që keni thënë, përfshirë edhe anëtarët e familjes tuaj të ngushtë.
• Ju keni të drejtë të dini se çfarë shkruan mjeku për ju në dosjen tuaj mjekësore.
• Detyra e konfidencialitetit zbatohet edhe nëse personi me të cilin keni folur ndërron punën.
• Detyra e konfidencialitetit vlen edhe për përkthyesit.
• Fëmijët mbi moshën 16 vjeç mund të vendosin vetë nëse prindërit do të kenë qasje tek informacioni i tyre shëndetësor.

Tarifa e reduktuar e pacientit

• Pacienti paguan një tarifë pacienti, ndërsa shteti paguan pjesën tjetër të kostos për të shkuar tek mjeku.
• Pacientët duhet të paguajnë vetë për fashat, shiringa, ilaçe, analiza etj. Kjo pagesë është mbi tarifën e pacientit.
• Fëmijët nën moshën 16 vjeç nuk e paguajnë tarifën e pacientit.
  Kontrollet e shtatzënisë janë pa pagesë.
• Tarifa e pacientit për një takim të zakonshëm tek mjeku është rreth 150 deri 300 NOK.
• Nëse keni një sëmundje kronike, ju paguani një tarifë pacienti për ilaçet me recetë "blu" (të rimbursueshme).
• Pasi të keni paguar një shumë të caktuar si tarifë pacienti brenda një viti kalendarik, do të keni të drejtë të merrni një kartë përjashtimi (kartë "falas"). Pasi të keni paguar këtë shumë si tarifë pacienti, Administrata e Ekonomisë Shëndetësore (HELFO) do t'ju dërgojë një kartë përjashtimi, ose do të keni qasje në një kartë dixhitale përjashtimi në helsenorge.no. Këtë kartë duhet ta paraqisni kur shkoni tek mjeku ose kur blini ilaçe me recetë të rimbursueshme. Kjo do të thotë që ju nuk keni pse të paguani tarifë pacienti për pjesën tjetër të vitit kalendarik.

Përdorimi i përkthyesit

Nëse ju dhe mjeku nuk e kuptoni njëri-tjetrin, keni të drejtë të keni një përkthyes me vete kur vizitoheni tek mjeku. Kjo është pa pagesë për ju.

• Si funksionon shërbimi shëndetësor në vendet që njihni?
• Kur është falas për pacientin, paguan shteti për trajtimin. Nga i merr shteti paratë?
• Cilat janë përfitimet e të pasurit një mjek familje?
• Ku është urgjenca juaj më e afërt?